Türkmenistanyň Halk Maslahatynyň Başlygy Türkiýe Respublikasynyň wekilleri bilen duşuşdy

2025-nji ýylyň 19-njy martynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyza sapar bilen gelen Türkiýe Respublikasynyň energetika we tebigy serişdeler ministri Alparslan Baýraktar hem-de «Botaş» kompaniýasynyň Baş direktory Abdulwahid Fidan bilen duşuşdy.

Myhmanlar duşuşmaga hem-de ikitaraplaýyn hyzmatdaşlygyň ileri tutulýan ugurlaryny ara alyp maslahatlaşmaga döredilen mümkinçilik üçin hoşallyklaryny bildirip, Türkiýe Respublikasynda Garaşsyz Türkmenistan bilen dostlukly gatnaşyklaryň pugtalandyrylmagyna möhüm ähmiýet berilýändigini bellediler hem-de türkmen halkynyň Milli Liderini mukaddes Oraza aýy bilen gutladylar.

Şeýle-de Alparslan Baýraktar pursatdan peýdalanyp, Türkiýe Respublikasynyň Prezidenti Rejep Taýyp Ärdoganyň Milli Liderimize iberen mähirli salamyny ýetirdi.

Türkmen halkynyň Milli Lideri gutlaglar üçin minnetdarlyk bildirip, doganlyk ýurduň döwlet Baştutanyna iň gowy arzuwlaryny beýan etdi. Türkmen halkynyň Milli Lideri myhmanlary Aşgabat şäherinde «Halkara parahatçylyk we ynanyşmak ýyly: durnukly ösüşi üpjün etmekde sebitara ykdysady hyzmatdaşlygyň orny» atly halkara maslahatyň geçirilýän gününde kabul etmäge şatdygyny aýdyp, wekiliýetiň saparynyň netijeli geçjekdigine we türkmen kärdeşleri bilen duşuşyklaryň ýurtlarymyzyň energetika ulgamyndaky hyzmatdaşlygyny mundan beýläk-de ösdürmäge uly itergi berjekdigine ynam bildirdi.

Türkiýäniň energetika we tebigy serişdeler ministri Aşgabatda geçirilýän şu günki foruma gatnaşmaga çakylyk üçin hoşallyk bildirip, Türkmenistanyň başlangyjy boýunça 2025-nji ýylyň «Halkara parahatçylyk we ynanyşmak ýyly» diýlip yglan edilmeginiň ýurdumyzyň parahatçylyk söýüjilikli daşary syýasatynyň dünýä jemgyýetçiligi tarapyndan ykrar edilmeginiň güwäsi bolup durýandygyny belledi. Şunuň bilen birlikde, Alparslan Baýraktar Türkmenistanyň Halk Maslahatynyň Başlygynyň üçünji Antalýa diplomatiýa forumyndaky çykyşynda öňe süren başlangyçlarynyň, parasatly maslahatlarynyň möhüm ähmiýetini belledi.

Rejep Taýyp Ärdoganyň «Bir millet — iki döwlet» diýip belleýşi ýaly, häzirki wagtda Türkiýe Respublikasy Türkmenistanyň iri söwda-ykdysady hyzmatdaşy bolmak bilen, daşary söwda dolanyşygynda öňdäki orunlaryň birini eýeleýär diýip, Milli Liderimiz aýtdy we ýangyç-energetika, ulag-aragatnaşyk, maýa goýumlar pudaklarynda netijeli ikitaraplaýyn we sebit derejesindäki gatnaşyklary ösdürmek üçin ägirt uly mümkinçilikleriň bardygyny nygtady.

Türkmenistanyň Halk Maslahatynyň Başlygy tebigy serişdeleriň ägirt uly gorlaryna eýe bolan ýurdumyzyň energetika pudagynda Türkiýe Respublikasy bilen hyzmatdaşlygy has-da işjeňleşdirmäge taýýardygyny tassyklap, türkmen tebigy gazynyň doganlyk ýurda iberilmeginiň, şol ýerden bolsa Ýewropa ýurtlaryna çykarylmagynyň möhüm meseleleriň biridigini belledi.

Nygtalyşy ýaly, häzirki wagtda türkmen tebigy gazy Eýran Yslam Respublikasynyň üstünden SWAP usuly arkaly Türkiýe Respublikasyna ugradylýar. Şeýle hem Hazar deňziniň türkmen kenarynda gurulýan utgaşykly dolanyşykda işlejek elektrik stansiýasynyň işe girizilmegi bilen, elektrik energiýasyny deňziň üstünden goňşy döwletlere, şol sanda doganlyk Türkiýe Respublikasyna we beýleki ýurtlara eksport etmek mümkinçiligi dörär.

Türkmen halkynyň Milli Lideri ýurdumyzyň agzalyp geçilen ugurlar we başga-da özara gyzyklanma bildirilýän meseleler boýunça türk tarapynyň anyk tekliplerine seretmäge hem-de netijeli başlangyçlaryny goldamaga taýýardygyny aýtdy.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de dostlukly ýurduň wekilleri Türkmenistanyň we Türkiýe Respublikasynyň halklarynyň bähbitlerine laýyk gelýän köpugurly hyzmatdaşlygyň mundan beýläk-de ösdüriljekdigine ynam bildirip, birek-birege iň gowy arzuwlaryny beýan etdiler.